close

Vetëm në WHO

NË KOPERTINË/ Erisa Xhixho: Udhëtimi 13-vjeçar në politikë dhe jeta me Enean e Henrin

erisa

Nga revistawho.com / Fotot: Bevis Fusha

Kur vendosa të përfshihesha në politikë isha 17-18 vjeç dhe gjyshja ime më tha se je shumë e vogël, se politika është shumë e egër dhe e ashpër, ndaj unë i kujtova se në moshën time, ajo dhe gjyshi kishin shkuar partizanë”. Erisa Xhixho, kandidate e LSI-së në Fier, vjen në një rrëfim për fëmijërinë, familjen e madhe e familjen e vogël. Nis me gjyshërit, e vjen te Enea e Henri, pa lënë jashtë vëmendjes, një shpjegim për platformën e saj në zgjedhje dhe atë të partisë që përfaqëson.

“Ky vit ka qenë një mrekulli, ka qenë një dhuratë nga Zoti. Ishte dëshira e të dyve të kurorëzonim dashurinë tonë me një fëmijë. Pavarësisht netëve të gjata pa gjumë e sakrificave si çdo nënë, falenderoj Zotin që më solli një bekim aq të madh”, thotë për të birin, që tani ka nisur të ecë, të thërrasë mama e baba dhe di edhe të përqafojë me krahët ende të vegjël.

Është edhe një rrëfim i udhëtimit 13-vjeçar në LSI, prej kohës kur ende gjimnaziste zgjidhte udhën ku është sot, duke prekur edhe postet me larta të pushtetit, siç është detyra e zëvendësministres së Integrimit. E megjithëkëtë, Erisa mbetet e thjeshtë, flet me pasion, i ndrijnë sytë kur flet për të birin dhe argumenton mandej, anullimin e impiantit të plehrave në Fier, problematikën e naftës dhe Marinzës, arsimin profesional, uljen e taksave dhe tatimfitimin me fasha, duke e përkthyer këtë në rritje të punësimit.

Erisa shfaqet siç është, në një përmbledhje vitesh që kanë ndryshuar të tashmen e të ardhmen e saj, kjo edhe falë arsimimit.

-Pedagoge në Fakultetin e Drejtësisë, me studime master në Londër, me titull Doktor Shkencash. Pse je kthyer në Shqipëri?

Që kur kam mbaruar studimet e drejtësisë, kam mbaruar master e kam filluar pedagoge në 2008-ën, dëshira ime për të bërë një master në Londër ishte që të rrisja aftësistë e mia të mësimdhënies, por edhe backgroundin tim akademik. Më shërbeu shumë pasi pashë një tjetër qasje në mësimdhënie, në literaturë, i shërbeu shumë edhe kërkimeve të mia për doktoraturën, por në asnjë moment nuk kam menduar të rrija në Londër, sepse investimi im është këtu. Kam hyrë në politikë që në moshën 18-vjeçare dhe familja ime, të dashurit e mi janë këtu ndaj dëshira ime është për të investuar më të mirën në vendim tim, pasi besoj se ka ende shpresë që ky vend mund të bëhet në aspiratat që ne kërkojmë.

-A të mungon koha e studimeve në Angli? A ndjen ndonjëherë nevojën të ikësh e t’ia nisësh nga e para atje?

Padyshim që e ndjej. Kam shumë nostalgji. Kam kaluar një vit e gjysmë shumë të bukur, me miq të rinj, një përvojë që më ktheu në bankat e shkollës, jam e afeksionuar me librat dhe edukimin. Ndjej padyshim ndonjëherë dëshirën që të rikthehem në ato ditë, por është edhe nostalgjia e të qenit studente. Në vitin 2012 vendosa që të ikja për studime për t’iu rikthyer bankave të shkollës, mbase edhe për t’u shkëputur pak nga rrëmuja e Tiranës, e politikës, si edhe për t’iu kushtuar edukimit pasi besoj që në fund të ditës, ai është arma më e fuqishme për të ndryshuar jetën tonë e për të kontribuar për vendin.

-Më kujtohet ende ajo fotoja jote nuse. Në sfond duket deti…

Ah, shumë romantike. Rishoh fotot, rishoh videon. Pas kualifikimit tim në Londër, unë dhe Enea vendosëm të lidhnim kurorë, pas 7 vitesh lidhje. Padyshim një nga arsyet e kthimit në Shqipëri, do të ishte Enea. Ka qenë një dasmë si në ëndrrat e mia, buzë detit, e qetë, pa shumë zhurmë, me të dashurit e mi më të afërt. Më vjen mirë që nga ajo lidhje më pas do të vinte djali jonë, Henri.

-Prej vitesh ke qenë një zë aktiv i LSI-së. Nga kryetare e LRI-së deri te zëvendësministre Integrimi, ka qenë shumë rrugë. Me se je përballur?

Kam qenë maturante te Petro Nini, përgatitesha për të fituar të drejtën e studimeve në Fakultetin e Drejtësisë, kur u angazhova. Tani që e mendoj janë 12-13 vjet. Është i njëjti pasion dhe e njëta dëshirë për të kontribuar. Isha një nga ata të rinjtë që vendosi të jetonte e të studionte në Shqipëri dhe doja të kontribuoja sa mundesha në politikë dhe te një forum rinor, i cili të ishte aktiv gjatë gjithë kohës e të ndërtonte lidership. Jam shumë krenare që sot LRI ofron lidership, pas 14 vitesh investim të LSI-së dhe të rinisë. Më vjen mirë që sot në listat për kandidatë për deputet kemi shumë të rinj, të cilët e kanë filluar si unë karrierën e tyre politike, shumë te vegjël, e shkallë-shkallë, kanë treguar meritokraci brenda partisë por pa anashkaluar në asnjë moment arsimimin e edukimin që unë e kam primar.

-Monika Kryemadhi, kujtoi kohë më parë se ti ishe gjimnaziste kur shkove në LSI ndërsa sot i tregon rrugën. Si janë marrëdhëniet mes jush?

Monika është nje mikeshë, shumë e mirë, një mbështetëse shumë e madhe për mua edhe në momente të vështira që politika ka, të zhgënjimeve apo të përplasjeve, intrigave. Padyshim, edhe pse ajo sot kandidon në Elbasan e unë në Fier, është aty gjithë kohës, në çdo moment, për të më dhënë suport, e për të më thënë ec përpara se je shumë mirë dhe mos u tundo e mos u demoralizo në asnjë moment. Ajo ka qenë një nga arsyet që unë u përfshiva në politikë në moshën 18-vjeçare. Ka qenë një njohje e jona, e kryesisht e motrës sime me të, që ka qenë e angazhuar në FRESSH. Kjo miqësi është konsoliduar dhe tani ajo është si pjesë e familjes sime.

-Sa dëgjohet zëri i të rinjve në parlament?

Mendoj që me kandidimin dhe futjen në parlament të Kejdi Mehmetajt në 2013-ën, pavarësisht spekticizmit dhe të gjithë agresionit që mori se si një e re mund të përfaqësonte kauzat e rinisë kur ende ishte studente- modeli që ajo solli, në mbrojtje të kauzave duke qenë shumë aktive, duke u ballafaquar edhe me aktorë të vjetër të politikës, solli një gjë shumë të mirë. Solli rritjen e besimit të lidershipit të LSI-së, për të kandiduar më shumë të rinj në politikë e në këshillat bashkiakë. Në atë të Tiranës ne kemi shumë të rinj që kanë shfaqur aftësi të mira në kujdesin ndaj njerëzve, në artikulimin e mbrojtjen e kauzave. Politika në fund të ditës është përfaqësim ndaj kërkohet përfaqësimi i grave dhe vajzave në parlament, për të çuar përpara kauzat e tyre, por duhet edhe përfaqësimi i të rinjve duke qenë se jemi një popullsi me moshë të re. Kemi të rinj të shkëlqyer, të mirarsimuar. LRI sjell një model të të rinjve që kalojnë në karrierë politike që nga anëtari i thjeshtë, duke ecur deri në anëtar kryesie. Përgatiten për vite me radhë ndaj sot kemi mundësi t’u ofrojmë qytetarëve shqiptarë, të rinj të miredukuar me aftësi për t’i përfaqësuar ata denjësisht në parlament.

-Ke thënë se je rritur me vlerat e Luftës Nacionalçlirimtare. Çfarë mesazhi ke marrë prej këtyre vlerave?

Unë vij nga një familje dëshmorësh. Gjyshi im Thoma Xhixho ka qenë Komandant i Akademisë Ushtarake, ka luftuar së bashku me shumë anëtarë të fisit tim në LANÇ dhe gjithmonë është festuar në familjen time “5 Maji” apo 28-29 nëntori. Që kur kam qenë e vogël, mbaj mend vizitat që nderonin ata që dhanë jetën për vendin. Jam rritur me këto vlera, te besimi e patriotizmi, që duhet pasur ndaj vendit e mirënjohja ndaj atyre që kanë dhënë jetën për Shqipërinë e pavarur. Besoj që këto vlera i mbart e këto kanë ndërtuar Erisën e majtë, te kujdesi ndaj njerëzve, te politikat e majta dhe te të rinjtë që në atë moshë, kanë qenë partizanë, ashtu si gjyshërit e mi. Kur vendosa të përfshihesha në politikë isha 17-18 vjeç dhe gjyshja ime më tha se je shumë e vogël, se politika është shumë e egër dhe e ashpër, ndaj unë i kujtova se në moshën time, ata kishin shkuar partizanë. Më vjen mirë e jam krenare për mbiemrin që mbaj, për vlerat që ka familja ime dhe për vlerat e LANÇ, që trashëgohen e që nuk duhen harruar.

-Çfarë e lidh Erisën me Fierin, përveçse po kandidon atje?  

U delegova në Fier në shkurt, për të riorganizuar rininë, gratë e vajzat dhe strukturat. Padyshim që ishte një përvojë e re, ishte një qark që kishte shumë potencial për LRI-në dhe LSI-në, një elektorat i majtë. Me kalimin e kohës kuptova që kam një të përbashkët shumë të madhe: të gjitha familjet fierake, investimin më të madh për fëmijët e tyre e kanë te edukimi. I çojnë nëpër kurse, në shkollat më të mira, e sakrifikojnë çdo gjë për një edukim sa më të mirë që çon në një punësim sa më të mirë nesër. Këtë ka bërë familja ime edhe unë gjithë jetën. Gjithnjë, qoftë nga familja ime, apo lidershipi i LSI-së, nga Mona e z.Meta, më është këshilluar që duke qenë ekselente, a me nota shumë të mira në arsim, ti mund t’i shërbesh, më mirë politikës. E ky është mesazhi im për të gjithë të rinjtë e të rejat: krahas angazhimit politik, mos të harrojnë edukimin e tyre. Kjo është vlera më e madhe që unë ndaj me familjet fierake. Më ka bashkuar shumë me të gjithë ata edhe dëshira ime për të përfaqësuar gratë, vajzat e të rinjtë në mënyrë dinjitoze në parlamentin e pas 25 qershorit, duke sjellë një qasje tjetër ndaj politikës. Është qasja e kujdesit ndaj njerëzve, qasjen e debateve për politikat e zhvillimit të turizmit, bujqësisë për qarkun e Fierit, uljen e taksave dhe nxitjen e punësimit të të rinjve. E këto do jenë debatet e mia në parlamentin e pas 25 qershorit dhe jo më një politikë konfliktuale, me debate boshe që nuk i shërbejnë askujt.

-Një prej problemeve të mëdha në Fier, është çështja e naftës, ndotjes, problemet e Marinzës. Çfarë do bëhet me këta banorë që vuajnë prej vitesh, që u shkatërrohen shtëpitë, tokat e shëndeti?

Padyshim të gjitha koncesionet e dhëna e që kanë sjellë problematika që edhe ju si media i keni pasqyruar, ne mendojmë t’i rivlerësojmë dhe t’i shqyrtojmë, në mënyrë që banorët e atyre zonave të jenë përfituesit më të mëdhenj të asaj pasurie që ka aty. E kemi ndjekur së bashku edhe me grupin tonë parlamentar vazhdimisht atë problemtikë. Padyshim që si deputete e ardhshme, do jem aty për të mbrojtur interesat e qytetarëve, më shumë se sa çdo interes tjetër.

– Këtë vit, një debat i madh shoqëroi anulimin e impiantit të mbetjeve në Qarkun e Fierit, për shkak të rrezikut që paraqiste. A ka gjasë që projekti të rikthehet?

Kemi qenë me një qëndrim të qartë për çështjen si anëtarët tanë në këshillin bashkiak në Fier, si ne si drejtues të qarkut. Ka pasur një shqetësim shumë të madh nga banorët, për mënyrën jo shumë transparente të miratimit të këtij impianti, nuk ka kaluar në konsultim publik, nuk janë sqaruar qytetarët. Kemi qenë për zbatimin e ligjit e nëse ai parashikon konsultim publik dhe sqarim të qytetarëve se cilat janë të mirat dhe problematikat e një impianti të tillë, ajo duhet bërë. Mosinformimi e mungesa e një procedure transparente solli reagim qytetar dhe ne përmes shkresës që i dorëzuam Ministrit të Drejtësisë dhe atij të Mjedisit, kërkuam zbatim të ligjit. Do të jemi në krah të qytetarëve  në mënyrë që të jenë të qetë për çdo investim që ndodh në qarkun e Fierit, sidomos për impiantin e plehrave. Kjo pasi nëse ai nuk ndërtohet në zbatim të ligjit dhe me transparencë, mund të dëmtojë jo vetëm bujqësinë e shëndetin njerëzve, por edhe mjedisin. Kemi qenë dhe do të jemi të prerë për këtë çështje. Nuk ka impiant pa transparencë me qytetarët për procedurat e ndërtimin.

-Nëse flasim për vende pune, si do të gjenden ato? Një administratë e mbushur dhe biznese që nuk është se janë pa punë sepse nuk kanë kë punësojnë- ku është çelësi i zgjidhjes?

Ne jemi për uljen e taksave, politikë që i jep frymëmarrje bizneseve. Në këtë katërvjeçar është vënë re që taksa progesive dhe tatimfitimi 15% ndaj bizneseve, ka rritur informalitetin. Shumë prej bizneseve nuk i deklarojnë të ardhurat sepse nuk përballojnë taksat. Ne jemi për taksa me fasha sipas xhiros vjetore. Nga 0 deri në 20 milionë lekë të rinj të kesh tatimfitimin 5%; nga 20 milionë në 100 milionë lek të rinj xhiro vjetore të jetë 8% përqind që është tërheqëse edhe për rajonin çka sjell investime të huaja dhe në mbi 100 milionë lek të rinjtë jetë 10%. E ndarë me fasha është më e drejtë dhe krijon frymëmarrje te biznesi, i jep mundësi të zgjerohen e të punësojnë më shumë të rinj e të reja. Për të rinjë që nuk kanë përvojë, punësohen për herë të parë, qoftë në biznes të vogël a të mëdha të kemi mundësi të subvencionojmë sigurimet shoqërore dhe shëndetësore për një vit në mënyrë që të nxitet punësimi. Për të rinjtë, problem mbetet mungesa e përvojës, ndaj parashikojmë krijimin e praktikave të punës 3-6 muaj për studentët, në administratë apo pranë një biznesi që të njihet me ligj e të kenë mundësi t’ia paraqesin punëdhënësit nesër. Kemi edhe fuqizimin e arsimit profesional, i lidhur me biznenin. Marr shembull Gjermaninë ku gjithë bizneset kanë marrëveshje me arsimin profesional për një qark të caktuar apo për një zonë të caktuar. Pra drejtojnë arsimimin drejt profileve që ka nevojë tregu. Kjo do të bëjë që të rinjtë të kenë kurrikula më të mira, t’i lidhin ato me praktikën, t’i lidhin me tregun e punës, të kenë mundësi të bëjnë praktika pranë bizneseve e pas trevjeçarit, ata të jenë shumë më të aftë se sa janë sot, për tregun e punës. Kjo ka ardhur edhe nga bisedat që ne kemi pasur me gjimnazistët e arsimit profesional, që kanë probleme me kurrikulat që nuk janë praktike dhe me praktikat e punës, që nuk i bëjnë fare, bëjnë vetëm teori.

Kemi programin “Mëso dhe fito”, ku si në Londër, studentët ekselentë, kanë një kontratë të nënshkruar direkt me punëdhënësin, në mënyrë që truri të mos mbetet pa punë, sepse ai duhet të jetë i pari që të integrohet. Ne duam të ofrojmë që në kohën e studimeve, trajnim e kualifikim, si edhe praktika pune për studentët. Kjo vjen nga praktikat më të mira europiane. Nga ana tjetër, çdo nismë e dëshirë për të hapur biznes nga të rinjtë, duke ditur që nuk kanë kolateral e nuk marrin dot kredi, ne të kemi mundësi t’i mbështesim me grante apo kredi të buta deri në 2% që të kenë mundësi ta vënë në jetë ëndrrën. Këtë e kemi ngritur në bashkinë e Tiranës, e kemi implementuar dhe e dimë shumë mirë se si ta vëmë në jetë në rang kombëtar. Ndaj them se është plan i vërtetë.

Për 100 mijë vende të reja pune që parashikojmë për të rinjtë i kemi të ndarë sipas sektorëve: 15 mijë në fushën e shërbimeve, 25 mijë në fushën e bujqësisë meqë synojmë t’i japim frymëmarrje asaj duke trefishuar buxhetin për të, duke zeruar tvsh dhe taksat për produktet bujqësore që fermeri të mos lodhet zyrave të burokracisë por të jetë i përqëndruar të prodhimi e shitja, subvencionimi i farërave, pesticideve e produktet e tjera që i vijnë në ndihmë; 35 mijë vende pune nga turizmi, duke hapur përshembull një shkollë profesionale për turizmin në Fier dhe 25 mijë vende pune në infrastrukturë. Është plan konkret e real.

– Një vit më parë, jeta e juaj dhe e bashkëshortit, Eneas, ndryshoi meqë u bëtë prindër për herë të parë. Si ka qenë ky vit?

Ky vit ka qenë një mrekulli, ka qenë një dhuratë nga Zoti. Ishte dëshira e të dyve të kurorëzonim dashurinë tonë me një fëmijë. Pavarësisht netëve të gjata pa gjumë e sakrificave si çdo nënë, falenderoj Zotin që më solli një bekim aq të madh sepse ka rritur dashurinë në familje, buzëqeshjet e çdo gjë tjetër.

-Pse e quajte Henri dhe si është dita jote me Henrin?

Ka qenë një betejë për emrin, një betejë 6 mujore (qesh).  Me Enean vendosëm për emrin Henri, na pëlqeu të dyve shumë e sidomos Eneas se i shkon edhe me mbiemrin Nuredini. Emri është shumë i rëndësishëm për personalitetin e fëmijës, thonë se vendose emrin që t’i shkojë kur ai të jetë 30 vjeç, ndaj e menduam. Doja një emër që edhe jashtë vendit të tingëllonte mirë, e të mos ia deformonin. Tani që e shoh të rritet, mendoj se i përshtatet shumë me karakterin.

Dita me të është një ditë plot dashuri. Këto ditët e fushatës janë  ditë që e takoj më pak, por jam gjithnjë e përkushtuar me dashurinë time për të. Mjeku Edi Tushe më thotë që vetëm dashuri dhuroji, mos ia përço stresin tënd dhe këtë bëj. Ai ka filluar të belbëzojë, thotë ‘mama’, ‘baba’, ‘nëna’, ‘gjyshi’; ecën pak dhe është një periudhë e bukur. Të përqafon, reagon dhe mezi pres që pas fushatës t’i përkushtohem më shumë e të kompensoj mungesën.

-Kujt i ka ngjarë ai? Kujt dëshiron t’i ngjajë?

Lëkurën e ka timen. Tiparet i ka të babait. Thonë që gjenetikisht inteligjenca e merr nga mami, gjë që është e rëndësishme për mua(qesh). I ngjan të atit në shumë në tipare, ndërsa buzëqeshjen e ka timen.

-Ku e sheh veten në 5 vitet e ardhshme?

Padyshim që do të jem pjesë e Parlamentit të ardhshëm, për të përfaqësuar Qarkun e Fierit dhe në radhë të parë gratë, vajzat dhe të rinjtë e mrekullueshëm të Fierit, Lushnjës, Patosit, Roskovecit, Mallakastrës e Divjakës. Unë jam një nga ata njerëz që kënaqet me gjërat e vogla, e jam e kënaqur me këto që kam ndërtuar. Më lumturon familja ime, vijoj të jap mësim si pedagoge part time, e nuk bëj plane, jam e lumtur dhe jam me fat për këto që kam sot. Jam e lumtur për familjen time dhe uroj që jeta në Shqipëri të jetë më e mirë për të gjithë. Unë do jem në politike dhe në edukim e deri pas pesë vitesh mund të jem me një fëmijë tjetër, ose me dy (qesh)./ revistawho.com

 

lexo më shumë

NË KOPERTINË / Floida Kërpaçi: E re për politikë? Rinia, forca për të ndryshuar vendin

kopertina (1)

Nga revistawho.com / Fotot: Eisar Asllanaj

Veçse 16 vjeç kur u angazhua në politikë, sot Floida Kërpaçi është kryetare e LRI-së dhe kandidate për deputete në Tiranë, ndaj mbron fort idenë e të rinjve në politikë. E pyes se çfarë ka mundur të ndryshojë ajo dhe më rendit disa nisma që kanë të bëjnë me të rinjtë. Mandej, kam kërshëri të di, se ç’bën në politikë një vajzë a djalë i ri, që nuk ka mundur të lexojë ende gjithë klasikët apo të shohë 100 filmat më të mirë të të gjitha kohërave. “Ata që rrëzuan sistemin diktatorial, ishin në moshë aq sa ç’jam unë”, – më thotë Floida dhe thekson se “rrëzuan regjimin dhe morën në dorë vendin”.

Ndërsa lista për kandidatë të LSI, është plot me të rinjë në qarqe të tjera dhe në Tiranë, Kërpaçi, pothuaj në emër të të gjithëve, jep gjithë arsyet pse këta janë gati.  

“Çfarë ndodh në disa raste është se politikanët që kanë shërbyer 4-5 apo më shumë mandate mund të humbasin lidhjen me njerëzit, veçanërisht me rininë. Ata shpesh herë edhe nuk i kuptojnë dot vështirësitë që ka rinia shqiptare. Kjo është arsyeja pse unë po kandidoj dhe jam shumë entuziaste”, – më thotë me një zë që nuk i dridhet, duke përçuar siguri në mendimin e saj.

Floida është një vajzë e re, që shkollohet në universitet publik, që jeton ende me ndihmën e familjes, në një Tiranë, ku është e vështirë pa ta, ekonomikisht, e jo vetëm. E pyes me dhe pa shaka për batutën e njohur mbi gjirokastritët kursimtarë, ngase andej ka origjinën. “Është mit ajo që jemi shumë kursimtar”, – më thotë, dhe shton me dhe pa shaka se “ne dimë të bëjmë ekonomi dhe ta menaxhojmë lekun”.

Më ka përmbledhur në një intervistë të vetme, pothuaj gjithë platformën elektorale, që i drejton sytë nga të rinjtë. Kam një merak për biletat e urbanëve në Tiranë, për mungesën e kondicionerëve, për kushtet e tyre, për vonesat, se më duhet t’i pres edhe më shumë se 20 minuta në stacione dhe Floida më premton se e ka në vëmendje, hallin tim, që nuk është vetëm i imi.   

Pak prej natyrës, pak prej profesionit i kërkoj të më bindë pse duhet të angazhohem edhe unë në poltikë, si mund të më bindë ajo se do të dëgjohem, se nuk do imitoj ata që kam përçmuar. E dini ç’më thotë Floida?
Për këtë, duhet lexuar intervista, ku ka shumë batuta e kundërbatuta, ç’janë intervistat e gazetarëve e politikanëve të mëdhenj, para kësaj tonës. Deri tani, nuk keni parë gjë akoma.

E ke nisur udhëtimin e madh, duke u bërë kryetare e LRI-së. Pse vendose të angazhohesh në politikë?

E kam nisur rrugëtimin tim politik kur isha në vit të dytë në gjimnazin “Petro Nini Luarasi”. I jam bashkuar të rinjve në gjimnazin tim që po angazhoheshin me LRI-në në hartimim e një programi për të përmirësuar sistemin e maturës shtetërore. U ndjeva shumë mirë, sepse ishte një forum ku kishte shumë të rinj energjikë, me vlera, me ide dhe mbi të gjitha këto ide dëgjoheshin, vlerësoheshin dhe me këto ide ata punonin për të hartuar një politikë konkrete siç ishte ajo për maturën shtetërore. Bashkëpunuam për këtë konferencë për maturën shtetërore ku dolëm me disa pika propozimesh dhe si gjimnazistë në realitetin ku jetonim, u munduam që të punonim së bashku për ta ndryshuar atë dhe për ta bërë më të mirë. Më pas vendosa të isha akoma e më e angazhuar, që atë që bëmë për maturën ta bënim dhe për aspekte të tjera të jetës së rinisë që nuk përfillen fare nga politika “e madhe”.

Jam bërë pjesë e politikës sepse, që të sjellësh ndryshimin duhet të bëhesh pjesë e tij dhe unë besoj që ndryshimin mund ta sjellë vetëm rinia e vendit. Kemi në Shqipëri të rinj të talentuar, profesionistë që kanë studiuar brenda dhe jashtë vendit, që kanë përvojë dhe vizion për të ardhmen e atë çka na pret. Duhet të bëjmë çmos si të rinj që t’i mbështesim të tilla modele, në politikë, në shoqëri e kudo që të vijë ndryshimi i vërtetë e zhvillues për të gjithë.

Çfarë përparësie ka në politikë një studente e farmacisë?

Politika ka nevojë për njerëz të përgjegjshëm e humanë, të cilët punojnë për vendin dhe qytetarët, kanë ndjenja dhe pikërisht unë besoj shumë që profesioni i farmacistit dhe i mjekut është një profesion shumë human, i cili i shërben politikës për ta bërë atë më të paqtë, të brishtë dhe për t’i dhënë humanizmin i cili i ka munguar gjatë gjithë kësaj kohe.

Po pavarësisht profesionit unë besoj fort që politikës i duhen njerëz që udhëhiqen nga dashamirësia për të bërë më shumë për të gjithë, nuk na duhen më njerëz në politikë që mendojnë për veten e interesat e tyre.

Si Anëtare e Këshillit Bashkiak të Bashkisë Tiranë, për çfarë ke ngritur zërin në bashki?

Në Këshillin Bashkiak të Tiranës nga 13 këshilltarë të Lëvizjes Socialiste për Integrim, 10 jemi nga forumi rinor i LSI dhe për këtë arsye unë si e re, bashkë me këshilltarët e tjerë kemi lobuar fort për çështjet madhore të të rinjve, kemi diskutuar për çështje si karta e studentit, aboneja e studentit, çështje të transportit publik për probleme të tjera të cilat i përkasin rrugicave të shumta në Bashkinë e Tiranës, duke përfshirë 11 njësitë, por edhe Ish-Komunat ku mund të themi se sot në dy vite punë, Tirana ka më shumë gjelbërim, rrugë të rehabilituara, parqe, kënde lojrash për fëmijët. Kemi kaluar në Këshillin Bashkiak dy projekt-vendime shumë të rëndësishme për të rinjtë, siç është projekti “Të rinjtë dhe të rejat drejt një profesioni” që i jep mundësinë të rinjve që nëpërmjet një trajnimi në biznese private apo në ndërmarrjet e Bashkisë të kenë mundësinë të kryejnë një praktikë pune dhe pastaj, pas kësaj praktike nëpërmjet aftësive të tyre, të punësohen pranë këtyre sektorëve – dhe projekti “Bizneset Sociale rinore” që i japin shansin të rinjve që kanë një biznes social, një ide inovatore të aplikojnë për këtë biznes.

Besoj se këto kanë qenë projekte shumë madhore për të rinjtë, por gjithashtu dhe projekti dhe fondi që kemi pasur për gratë sipërmarrëse i cili i jep shansin grave që kanë një ide biznesi të aplikojnë dhe të përfitojnë nga këto projekte dhe grante.

Problemet në Tiranë për të rinjtë janë nga më të shumtat dhe pa diskutim si e re, si studente ashtu si çdo i ri tjetër unë i jetoj këto sfida në kryeqytetin tonë, ku edhe pse shanset janë më të mëdha sfidat tona janë të jashtëzakonshme dhe për këtë arsye, ne si të rinj kemi punuar fort që realitetin në Tiranë ta ndryshojmë, kemi akoma shumë punë për të bërë. Pa diskutim që nuk do të ndalojmë asnjëherë së foluri e vepruari për sfidat dhe problemet e të rinjve dhe për t’i dhënë zgjidhje atyre. Të rinjtë sot në Tiranë dhe në mbarë vendin kanë shumë probleme, ankth e stres që nga momenti i parë kur shkojnë në shkollë dhe deri në momentin kur mbaron shkolla, për të hedhur hapa drejt një tregu pune. Për këtë arsye si të rinj që jemi, po punojmë fort për ta ndryshuar këtë realitet dhe ky është qëllimi i angazhimit tonë në politikë.

A kanë ardhur njerëz të ankohen për problematika të ndryshme mbi administrimin e bashkisë, a ke mundur t’i ndihmosh?

Unë kështu e shoh politikën – që politika është aty për t’u kujdesur për njerëzit e për të sjellë progres. Marrëdhënia jonë është me qytetarët dhe ne jemi në komunikim të vazhdueshëm me ta.

Kemi pasur shqetësime të shumta nga banorët e Tiranës dhe i kemi adresuar por shpesh herë edhe ne kemi bërë thirrje të shumta që njerëzit të na kontaktojnë sepse kështu na ndihmojnë dhe ne për të kuptuar më mirë nevojat e tyre.

Ne si këshilltarë të LSI kemi bërë dëgjesa në 11 Njësitë e Tiranës, por edhe në ish-Komunat me biznese, me të rinj, me gratë dhe kjo me një qëllim për ti dëgjuar për shqetësimet që ata kanë dhe në bazë të këtyre ne kemi hartuar paketat tona të propozimeve si në vitin 2016 ashtu dhe këtë vit ku këto kërkesa kanë nisur që nga qendrat rinore duke vazhduar deri te rehabilitimi i rrugëve apo kërkesa të tjera të cilët banorët kanë qenë të shqetësuar dhe kërkonin zgjidhje. Pa diskutim që një pjesë e kërkesave kanë gjetur zgjidhje, janë bërë pjesë të buxhetit dhe një pjesë e tyre janë projektuar për këtë buxhet dhe për këtë arsye sot ndihem mirë sepse ne kemi çuar me shumë krenari misionin tonë përpara për t’i shërbyer qytetarëve dhe për të qenë çdo ditë me ta sepse kjo është detyra jonë dhe padiskutim që duhet të bëjmë më të mirën. Çdo qytetar i Tiranës meriton të jetojë në një Tiranë më të mirë por duhet puna jonë, një bashkëveprim më i ngushtë mes qytetarëve e përfaqësuesve të tyre, që të angazhohemi të gjithëve për të sjellë dhe për të ofruar më shumë shanse. Unë i bëj thirrje të gjithë qytetarëve të Tiranës por edhe të Shqipërisë, të na shkruajnë për shqetësimet dhe problemet që ata kanë dhe së bashku të gjejmë zgjidhje për to.

Transporti urban, vonesat, tejmbushja, rritja e çmimit të biletës, kondicionerë të fikur. Çfarë mund të bëhet, për të përmirësuar jetesën e përditshme të qytetarëve të Tiranës?

Prandaj jam angazhuar në politikë dhe prandaj besoj që të rinjtë duhet të bëjnë të njëjtën gjë sepse një i ri e njeh realitetin, e jeton atë dhe do ta ndryshojë atë. E di që nuk janë kushtet më të mira në transportin publik, duhet akoma më shumë punë, të përmirësohet sistemi i transportit publik sepse është shumë shqetësues dhe për këtë gjë unë kam diskutuar edhe në Bashkinë e Tiranës që kërkohet më shumë vëmendje nga kjo anë, kërkohen shtimi i autobuzave, të kenë kushte më të mira, orare të besueshme dhe ti ofrojmë qytetarëve të Tiranës atë cilin meritojnë dhe për të cilën paguajnë.

Por kam besimin duke parë arritjet pozitive të Bashkisë në këto 2 vite, në fund të mandatit do të gjejmë zgjidhje reale për çështjet shqetësuese në transportin publik.

Kam lexuar një intervistë ku thua se të rinjtë duhet të angazhohen, të mos jenë indiferent, të japin ide të reja të ndryshojnë shumëçka. Si mund të më bindësh që duhet ta bëj, se do të dëgjohem, se nuk do imitoj ata që kam përçmuar? Çfarë ke mundur të ndryshosh ti?

Çfarë ndodh në disa raste është se politikanët që kanë shërbyer 4-5 apo më shumë mandate mund të humbasin lidhjen me njerëzit, veçanërisht me rininë. Ata shpesh herëedhe nuk i kuptojnë dot vështirësitë që ka rinia shqiptare. Kjo është arsyeja pse unë po kandidoj dhe jam shumë entuziaste që jemi kaq shumë të rinj nga LSI në listën e kandidatëve. Ne i kuptojmë sfidat që përballet rinia shqiptare, ne i jetojmë dhe i shohim te bashkëmoshatarët tanë përditë këto sfida. Unë besoj se ne na duhet një qeverisje që e ndjen ndjenjën e përgjegjësisë dhe reagon aktivisht ndaj sfidave që përballet rinia jonë. Rinia shqiptare ka nevojë për më shumë zëra në parlament e qeveri që të adresojë shqetësimet e saj. Mendoj se ti, ashtu si dhe rinia shqiptare duhet patjeter të angazhohet! Sepse nëse jemi bashkë, jemi më tëfortë, prodhojmë më shumë ide dhe vendi ynë më shumë se kurrë ka nevojë për idetë e energjitë e rinisë për të ecur përpara me një drejtim të ri qeverisës që kujdeset për njerëzit.

E re, studente, në politikë, në fushatë. Je pjekur para kohe, apo kemi të bëjmë me një brez që është më i zgjuar se paraardhësit? Një 22-23 vjeçar 10 vjet më parë, nuk ishte ende gati të merrte angazhim si deputet, pse sot është? Pra, pa i lexuar të gjithë klasikët, pa parë 100 filma me çmime Oscar, pa e njohur administratën nga brenda, si është të jesh gati kaq shpejt?

Shpesh herë kam dëgjuar dhe kam lexuar nga shumë skeptikë se të rinjtë nuk munden, të rinjtë nuk kanë eksperiencë. Dua të them tre pika shumë të rëndësishme për këtë gjë.

E para a nuk ishin pikërisht të rinjtë në vitin ‘90 që sollën demokracinë në vend dhe ishin pikërisht këta të rinj drejtues të vendit tonë në atë kohë.

E dyta në qoftë se ju quani eksperiencë dhe aftësi modelin që na kanë sjellë këta pushtetarët e sotëm,modelin e kanabisit, modelin e dhunës, modelin e të qenit kriminel apo bandit atëherë unë si e re do të ndihesha shumë e ofenduar në qoftë se do më kërkohej të kisha këtë background. Ama ajo që unë si e re sjell është vizioni im, përkushtimin dhe sinqeritetin tim për të thënë të vërtetën, për të punuar për të vërtetën dhe për të sjell ndryshimin në vendin tonë i cili realisht na ka munguar sepse askush nuk ka punuar dhe nuk na ka dëgjuar për këtë realitet që ne jetojmë por gjithmonë na kanë dëgjuar në momente kur kanë pasur interes për të marrë votën. Politika nuk është çështje pushteti, por si t’i shërbesh qytetarëve dhe t’i japësh një shans për të patur një jetë më të mirë. Ne jemi gati sepse kush më mirë sesa një i ri i di problemet e të riut sepse ne i jetojmëçdo ditë ato sfida dhe pa dyshim do të luftojmë fort për ti ndryshuar ato.

Si mund të bindet një elektorat gri, që të votojë së pari dhe LSI-në së dyti? A ka një çelës komunikimi, me banorët e Tiranës, që të të besojnë, ty, partisë tënde, bindjeve të tua, fjalëve të tua?

Vota është e drejtë kushtetuese për çdo qytetar shqiptar dhe secili duhet të shkojë të votojë, pavarsisht bindjeve. Pasi duke mos votuar, pa dashur i jepni shansin edhe atyre partivete cilat nuk do të sjellin asnjë politikë, nuk do të bëjnë asgjë të mirë për vendin dhe do ta çojnë vendin në greminë. E kemi aktual shembullin e të tillë partie, e cila ka rënë pre e nëj lidershipi që premtojë rilindjen por po than çdo shpresë që ka ngelur në vendin tonë.

Prandaj unë i ftojë qytetarët shqiptarë, prindërit, ata që presin apo kanë në plan të bëhen prindër, të votojnë për Lëvizjen Socialiste për Integrim dhe të mendojnë për fëmijët e tyre sepse një parti që mbështet rininë ka mbështetur dhe Shqipërinë, ndërkohë qënjë parti e cila nuk vetëm e përbuz rininë atëherë ajo nuk e do Shqipërinë.

Unë i ftoj të gjithë të rinjtë e familjet shqiptare që më datë 25 Qershor të votojnë numrin 1, të votojnë LSI sepse vota për LSI është vota për veten, familjen, vendin tonë dhe ka ardhur koha për të votuar partinë e cila është e thjeshtë, i mban premtimet, është mirënjohëse, sjell stabilitetin, mirëqenien dhe punon me politika konkrete për të përmirësuar jetën e të rinjve dhe duhet ti japim fund me votën tonë egoizmit, arrogancës, ndjenjës së unit dhe ti heqim përgjithmonë këta pushtetarë që mendojnë vetëm për veten dhe për familjen e tyre.

Më 25 Qershor voto për veten dhe familjen tënde.

Si e bën fushatën, ku shkon? Me çfarë udhëton një studente për të shkuar nëpër shtëpi e biznese?

LSI është në parti e thjeshtë e cila punon me modesti dhe përgjegjshmëri për të qëndruar pranë qytetarëve dhe pranë familjeve jo vetëm në fushatë por gjatë gjithë kohës sepse angazhimi dhe marrëveshja jonë është vetëm me qytetarin për politika që ndihmojnë dhe përmirësojnë jetën e tyre.

Ne shkojmë çdo ditë derë më derë, zemër më zemër te çdo familje për të takuar çdo qytetar të Tiranës dhe Shqipërisë për të përçuar te ata frymën, idetë dhe programin e Lëvizjes Socialiste për Integrim i cili do të krijojë më shumë shanse për punësim real të rinisë, për punë të mirëpaguara për familjet shqiptare, për të pasur një arsim më të mirë i cili të çon drejt një tregu pune të sigurt dhe mbi të gjitha për të pasur një ekonomi më të mirë në vendin tonë për ti rritur frymëmarrjen bizneseve, për të ulur taksat dhe për të krijuar vende të reja pune. Çdo ditë jemi në terren duke vazhduar punën tonë si çdo ditë të vitit për të dëgjuar qytetarët për problemet e tyre dhe për të punuar maksimalisht për të gjetur zgjidhje për to të cilat janë të shumta, janë të dhimbshme dhe në takimet që kemi çdo ditë me qytetarët kupton seriozitetin, kupton sesa e rëndësishme është që politika ti shërbejë qytetarëve.

Besimi te LSI është rritur jashtëzakonisht shumë dhe mirënjohja qytetare ndaj asaj cfare përfaqëson LSI më motivon akoma dhe më shumë për të punuar.

A je e pasur? Si jeton? Sa para harxhon në muaj?

Ne jemi një familje e thjeshtë, babin e kam ushtarak, ndërsa mamin ekonomiste.

E kam parë sakrificën që kanë bërë punuar fort për të më rritur mua, motrën dhe vëllain tim dhe na kanë rritur me bindjen dhe idealet që shkolla është shumë e rëndësishme dhe ajo të hap dyert e jetës dhe për këtë unë i jam shumë mirënjohëse prindërve të mi pa të cilët nuk do të isha këtu ku jam dhe nuk do të kisha hedhur asnjë hap, dhe një pjesë e energjive që kam vjen nga dëshira për ti bërë edhe prindërit e mi krenar për mundin e sakrificën e bërë për familjen.

Unëjam si të gjithë të rinjtë e tjerë dhe si të gjithë ju që po lexoni këtë intervistë dhe prandaj kam vendosur të bëhem pjesë e politikës,  për ta ndryshuar atë dhe për të punuar për këto familje të thjeshta.

A u merr akoma lekë atyre të shtëpisë?

Jeta në Tiranë është e vështirë, e kushtueshme dhe pa diskutim që duke qenë akoma në shkollë të lartë prindërit janë një ndihmesë shumë e madhe edhe për angazhimet e përditshme dhe pa diskutim që pa ta nuk do t’ia dilja dot, ashtu si nuk ja dalin dot dhe të rinjtë e tjerë si unë.

Prandaj kemi planin tonë për punësimin e të rinjve i cili do të mbështesë të rinjtë të cilët do të kenë mundësi të punojnë në një vend pune të mirëpaguar në mënyrë që të përballojnë kostot e jetesës.

Në moshën tënde, 30-vjeçarët e sotëm ende merrnin leje nga prindërit për të dalë, për në plazh, për kafe. Ti si ia bën?

Meraku i prindërve për fëmijët gjithmonë qëndron. Kjo është pjesë e kulturës shqiptare, i familjes së fortë e të lidhur që ne kemi. Këtë e shoh një gjë të mirë, edhe për ata 30 vjeçarët sepse dashuria në familje është dashuri në shoqëri e mendoj që duhet ta ruajmë këtë.

Pjesa më e vështirë për ne të rinjtëështë përkushtimi ndaj prindërve kur ata të kenë nevojë për ne.

Kur e gjen kohën për të shkuar në shkollë? Për të mësuar? Si do dalësh me provimet e sezonit?

Siç e thashë dhe më para ëndrra ime ka qenë të vazhdoja Universitetin e Mjekësisë dhe që e vogël lexoja libra të natyrës biologjike kështu që shkolla vazhdon të jetë pasioni dhe prioriteti im më i madh, pa diskutim që fushata ka angazhimin e saj dhe na ka mbërthyer në një mision për të qenë pranë qytetarëve por padiskutim një njëri që është racional dhe e organizon kohën mund të arrijë që ti realizoj objektivat që ai ka.

A je gjirokastrite si natyrë, pra kursimtare?

Unë jam shumë krenare që jam nga Gjirokastra e cila është djepi i kulturës. Përsa i përket mitit që jemi shumë kursimtar, ne dimë të bëjmë ekonomi dhe ta menaxhojmë lekun sepse po flisnim dhe më përpara vështirësitë sot të bëjnë të jesh një ekonomist i mirë për të përballuar sfidat e jetës.

Si e sheh këtë reformën në arsim, meqë je ende në shkollë?

Reforma në arsim për mua është një reformë e dështuar sepse nuk i ka dhënë transparencë meritokraci dhe shanse të barabarta të gjithë gjimnazistëve. Duke folur këtu për maturën shtetërore, si e tillë e kam ndier këtë nga mijëra maturantë të cilët nuk patën mundësi të shkonin në universitetet që dëshironin dhe qindra të tjerë u dyndën drejt universiteteve private dhe qindra kuota në universitetet publike ngelën të lira dhe kjo është një katastrofë sepse reforma nuk duhet ti shërbente universiteteve jopublike dhe personave të veçantë për ti bërë ata miliardera por duhet t’i shërbejë të rinjve.

Kjo reformë bëri që shumë familje shqiptare të merrnin borxh për t’i çuar fëmijët e tyre në universitete jopublike sepse mbi të gjitha në një familje prindërit gjithmonë sakrifikojnë për t’i rritur fëmijët dhe për ti çuar në shkollë të lartë kështu që unë gjykoj që reforma në arsim e para ishte një reformë e cila që nga drejtuesja e saj ministrja Nikolla nuk ishte e qartë dhe ishte një reformë që nuk i dha mundësinë të rinjve që të shkonin në shkollat që ata dëshironin por krijoi një kaos për të gjithë të rinjtë.

Unë shpresoj që këtë 4-vjeçar ashtu siç kemi këmbëngulur për të ndryshuar pika dhe kemi çuar dhe propozimet tona si Lëvizje Rinore për Integrim, përsa i përket maturës shtetërore do të punojmë akoma dhe më shumë për ta ndryshuar dhe për t’i dhënë një karakter të një reforme që i shërben të rinjve dhe jo klientelizmit të oligarkisë.

Ka shumë për të përmendur si dështime të kësaj reforme e skemi përmendur akoma  kushtet e dobëta në infrastrukturën e shkollave, mungesën e bibliotekave të pasura me libra e dije për të hapur horizontin e studentëve, trajtimi jo i denjë i pedagogëve të cilët duhen ndihmuar në mënyrë që edhe të performojnë më mirë, e shumë e shumë probleme të tjera.

Je në shkollë private a shtetërore, dhe pse e ke bërë këtë zgjedhje?

Unë studioj në Fakultetin e Farmacisë në Universitetin e Tiranës. Gjithmonë pa paragjykuar kam dashur të shkoj në shkollë shtetërore sepse e kam gjykuar atë më të fortë në kuptimin e sfidës dhe të vështirësisë dhe besoj se ajo të bën më të fortë për në tregun e punës. Një tjetër arsye ka qenë edhe egoja ime për të fituar një shkollë të mirë në bazë të rezultateve të larta që unë kisha. Universiteti publik është më konkurrues me më shumë sfida, arrin të dallosh miq edhe shok të cilët vijnë nga e gjithë Shqipëria dhe kupton sfidat edhe problemet që ata kanë dhe bashkarisht punon për të arritur rezulatet që synon.Gjithashtu universiteti publik ka kosto më të ulët dhe është më i përballueshëm për familjen time dhe familjet shqiptare.

Kur themi një shans për të gjithë, së pari është punësimi. Pa punë nuk ka shanse. Ku mund të gjenden këto vende pune? Administrata kaq është, bizneset private kaq janë, e shumë prej tyre paguajnë një herë në tre muaj dhe nuk i deklarojnë punënonjësi. Ku do gjenden shanse për të gjithë?

Prandaj ne kemi punuar me ekspertë të huaj dhe vendas për një plan i cili synon të hap 100.000 vende të reja pune duke u fokusuar në sektorët e turizmit, bujqësisë, shërbimet IT, shërbimet dhe konsulencat ligjore apo atyre financiare  dhe shërbimeve të tjera kjo sepse vendi ynë të jep shumë mundësi, është një vend i bekuar nga Zoti dhe të jep kushtet e duhura për të krijuar vende pune të mirëpaguara. Plani ynë për punësimin e të rinjve synon që të krijohen këto vende pune duke u mbështetur në këto sektorë dhe duke i dhënë një frymëmarrje të re vendit dhe shansin të rinjve për të punuar në vendin tonë. Arsim për Punësim është motoja jonë sepse realisht arsim pa punësim është në sakrificë e pashpërblyer dhe arsimi duhet ti shërbej tregut të punës dhe të rinjve për tu punësuar. Realiteti në vendin tonë kërkon ta shohim me sytë e të vërtetës, ti gjejmë hapësirat në vendin tonë dhe të krijojmë këto mundësi për të rinjtë. Hapësirat janë të shumta në sektorët e lartpërmendur dhe pikërisht këtë begati që kemi marrë nga Zoti duhet ta shfrytëzojmë për të krijuar vende të reja pune. Administratat kaq janë, bizneset kaq janë pa diskutim por në qoftë se ne përmirësojmë klimën e biznesit, duke ulur taksat, duke rritur investimet e huaja jam e bindur që mund ti krijojmë vendet e reja të punës që do tiu rikthejnë të rinjve shpresën për të ndërtuar të ardhmen e tyre në vendin e tyre.

Një moshatarin tënd që punon kamarier, ose shitëse, si e bind të të votojë? Çfarë do i ofroje?

Puna është nder dhe për ne të rinjtë puna është domosdoshmëri sepse si të rinj kemi nevoja të shumta të cilat familjet tona nuk e kanë mundësinë për të na i plotësuar të gjitha dhe unë kam shumë respekt për të gjithë të rinjtë që i krijojnë vetë mundësitë, të cilët në shumë rastë jo vetëm lehtësojnë familjen por edhe i ndihmojnë për të përballuar koston e jetesës.

Problemi është që pikërisht këto vende pune janë pak të paguara dhe njerëzit e kanë të vështirë të përballojnë koston e jetesës. Për këtë arsye duhet të përmirësojmë sistemin tonë arsimor dhe të krijojmë më shumë shanse për vende pune të mirëpaguara.

Shqipëria është e të rinjve dhe ndaj LSI i vendos të rinjtë të parët, është partia që mbështet të rinjtë dhe për këtë arsye do të punojë që të mos ua thyej shpresën këtyre të rinjve por ti krijojë shanset e një vendi me mirëqënie, me ekonomi të fortë dhe një vend që do të ecë me hapa të sigurt drejt Bashkimit Europian. I bëj thirrje gjithë të rinjve të votojnë numrin 1, sepse LSI ka një shans për të gjithë! / revistawho.com

lexo më shumë

NË KOPERTINË / Kejdi Mehmetaj, jeta jashtë parlamentit… Një vajzë e re përballë lubive të politikës

IMG_4872

“Djemtë më shihnin si deputete, të ftohtë dhe të largët, por kam treguar se kam çiltërsinë e moshës dhe se di të dua”

Nga revistawho.com / Fotot: Pirro Beati

 “Unë nuk merrem me kolegët, por me çështjet”. Këtë më thotë Kejdi Mehmetaj, deputetja e re e LSI-së, kur e pyes për përballjet me të mëdhenjtë e politikës. Mes tyre ka qenë edhe Zysh Lindita (Nikolla), ish-minsitrja me të cilën Kejdi pati përplasje për reformën në arsim.

Është një intervistë që ngërthen deputeten dhe vajzën e re, duke hyrë e dalë nga pyetjet standarde për një kandidate për deputete. E pyes përshembull, çfarë ka bërë me rrogën e parë dhe me thotë që e ka dorëzuar në shtëpi, rrëfen se nuk harxhon shumë për rroba siç bëjnë moshatarët e saj, shkojmë te gratë tek të cilat ajo merr shembull ku më përmend Monika Kryemadhin e Arta Daden, por më beson edhe stepjen që kanë pasur para saj djemtë, duke e menduar atë si deputete të ftohtë e të akullt.

Mbërrijmë te fushata dhe në fokus janë problemet e qytetarëve, reagimi ndaj të pakënaqurve, durimi ndaj atyre që i hakërrehen politikës. “Ndryshe nga të tjerët nuk bëjmë barcoleta, as show, jemi të përgjegjshëm dhe e kemi vërtetuar se i qëndrojmë fjalës së dhënë”, – thotë Kejdi teksa pranon se gjithsesi, çdo herë mendon se ku kanë gabuar dhe se si mund të ndihmohet qytetari.

Kjedi vjen në një rrëfim për jetën brenda e jashtë parlamentit ndërsa përgatitet për një mandat të dytë në kyvend, si deputete e Tiranës.  

Nga deputetja më e re në kuvendin e Shqipërisë, në një prej më aktiveve. Je përshtatur shumë shpejt, apo jo?

Unë e kam filluar angazhimin tim në politikë në moshë fare të re dhe tashmë janë bërë 9 vite aktive brenda LSI. Edhe pse e vogël kam marrë përgjegjësi brenda strukturave dhe kam trajtuar publikisht çështje të ndryshme që kanë prekur kryesisht bashkëmoshatarët e mi. Kështu, në momentin që u bëra pjesë e Kuvendit të Shqipërisë, vërtet isha më e reja në moshë, por kisha ndërkohë eksperiencë të mbledhur në vite. Kuptohet, vështirësia për t’u përshtatur në një ambient agresiv dhe pa argument është e madhe, por më kanë ndihmuar shumë temat që kam zgjedhur të trajtoj dhe kolegët e mi brenda grupit parlamentar. Kur ke siguri se çështjet të cilat po përmend janë të ndjeshme për ata që të kanë votuar dhe mbështetur dhe kur argumentat janë realë dhe të bazuar në fakte, atëherë edhe puna të bëhet më e thjeshtë. Përveç kësaj, puna ime e përditshme ka qenë kryesisht e fokusuar tek të rinjtë dhe me të rinjtë është shumë e vështirë të qëndrosh e qetë dhe pasive. Sidomos me të rinjtë e LSI që janë super energjikë (buzëqesh).

A ua ke dhënë rrogën e parë si deputete atyre të shtëpisë siç e do adeti?

(Qesh), pooo! Madje jo vetëm të shtëpisë, por si e do adeti edhe gjyshërve u kam bërë nga një dhuratë dhe gjithashtu bleva diçka për shtëpinë. Megjithatë, që të jem e sinqertë, muajt e parë ka qenë një vështirësi e madhe të menaxhoja rrogën dhe “borxhet” që merrja në shtëpi, pasi nuk mbaronin qerasjet (buzëqesh).

Si e ke shpenzuar rrogën? Me rroba, libra, udhëtime?

E kam shpenzuar nga pak me të gjitha. Nuk jam natyrë që shpenzoj shumë për veshje apo për pamjen e jashtme, madje është krejt e kundërta. Një pjesë të mirë të rrogës këto vite e kam shpenzuar edhe në aktivitete me miqtë e mi të forumeve brenda partisë, pasi ne kemi një frymë organizimi ku secili përpiqet të jap pak nga vetja dhe ai që është më i munduri të ndihmojë ata me më pak mundësi.

Si ndihet Kejdi kur duhet të dalë në foltore dhe të kundërshtojë përshembull zysh Linditën? E ke të vështirë?

Jam shumë e sinqertë me ju kur ju them se nuk e kam aspak të vështirë. Unë kam ndarë një parim me veten kur vendosa të përfshihem kaq shumë në politikë: Nuk do të flas asnjëherë pa argument dhe bindje dhe asnjëherë nuk do merrem personalisht me kolegët, por me çështje. Sa herë kam folur, replikuar apo mbajtur një interpelancë a qëndrim të caktuar, ka ardhur si rrjedhojë e bindjes sime për problemet e ngritura. Shumë herë jam nxehur me të pavërtetat që dëgjoj çdo ditë nga politika, shumë herë edhe kam marrë vrull për të replikuar, por në fund jam qetësuar dhe kam menduar me veten: Fundja ku do ndryshoj unë me ta, një vajzë e re në sjellje dhe mendësi, nga një klasë e vjetër dhe e ndryshkur politikanësh që ka vendi. Jam ndjerë shumë e keqardhur, kur nga mungesa e argumentit, kam dëgjuar edhe sulme personale kundrejt meje: se jam e vogël e s’kuptoj dhe se unë udhëhiqem prej gënjeshtrës, etj. E kam kaluar me indiferentizëm dhe përbuzje, pasi nuk besoj se ka shqiptar që mund të gjykojë kështu një vajzë të re, krahasuar me disa lubi të politikës sonë, që kanë qenë ministra dhe pushtetarë dhe që kanë përdorur karrigen veç për interesa të ngushta klienteliste. Fatmirësisht jetojmë në një vend të vogël, të gjithë njihen me të gjithë dhe gjykimit të publikut nuk i shpëtojmë dot, çfarëdo justifikimi të përdorim. Sa për zysh Linditën, hyn në këtë kategorinë e dytë dhe prandaj jo që nuk e kam patur problem, por e kam bërë punën edhe me më shumë këmbëngulje.

Kë ke shembull nga politikanet shqiptare? Po nga ato të huajat?

Unë i vlerësoj të gjithë zonjat dhe zonjushat që merren me politikë në Shqipëri, pasi përballen me shumë sfida dhe puna e tyre bëhet shumë më e vështirë se ajo e një burri, pavarësisht se detyra mund të jetë e njëjtë. Unë jam rritur me energjinë dhe vendosmërinë e Monika Kryemadhit dhe do e kem gjithmonë model për forcën e saj dhe përkushtimin që ka kundrejt atyre që punon, por mbi të gjitha të rinjve. Jam përpjekur të fitoj nga hijeshia politike e Arta Dades dhe ndihem keq që për shkak të kësaj politike që përdoret si pronë nga kryetarët e partive, ajo nuk do të jetë pjesë e parlamentit. Unë përpiqem të jem Kejdi dhe si rrjedhojë nuk marr shembuj, por përpiqem të mësoj nga vetitë më të mira të çdokujt. Si rrjedhojë edhe në politikën ndërkombëtare, më kanë pëlqyer zonjat e vendosura dhe luftarake si Margharet Thatcher. Megjithatë, duke qenë e majtë në bindje, shpesh gjej kontradita ndërmjet karaktereve që më pëlqejnë dhe politikave që ato kanë ndjekur.

Angazhimi politik, duket se të ka rritur shumë shpejt, duket se të merr gjithë kohën. Si je me çështjet e dashurisë?

Nuk do të thoja se më ka rritur shpejt, përkundrazi jam përpjekur politikës t’i jap më të mirën nga mosha ime. Si përshembull energjinë, idealizmin dhe pasionin. Dita për një vajzë të re është shumë e gjatë, i kalon 24 orët, ndaj edhe unë jam përpjekur të mos lë shumë gjëra pa bërë. Kuptohet vështirësia është aty dhe e pashmangshme. Në rastin e djemve përshembull, më shihnin si deputete, të ftohtë dhe të largët. Por në momentin e duhur edhe unë e kam treguar se kam çiltërsinë e moshës dhe se di të dua.

Si është Kejdi në shtëpi, në kohën e lirë? Ne të shohim vetëm me xhaketa e flokë të shtrira, në podiume. Si je jashtë deputetes? A vesh pantallona të shkurtra, kanotiere, a del me flokë të pakrehur, a vesh fustane?

Paska rastisur të më shihni në ditët e mia më të mira, pasi janë shumë të rralla rastet kur unë i shtrij flokët (qesh). Xhaketat i kam patur të miat edhe pa qenë në parlament, ndërsa në parlament solla xhinset edhe pse nuk na lejohen me rregullore (buzëqesh). Unë jam çdo ditë sportive, me raste edhe me pantallona të shkurtra apo xhinse të grisura. Përdor fare pak make up. Takat më pëlqejnë, por duke qenë se eci shumë, nuk janë komode për përditshmërinë. Vesh fustane dhe çdo gjë që ndjej se më rri mirë dhe më shkon. Kejdi në pamjen e saj nuk ka shumë ndryshime nga të qenurit deputete dhe nga të qenurit një vajzë 24-vjeçare në përditshmërinë e saj.

Në familje me kë jeton? A e ke mbështetjen e prindërve? A ndihen krenarë?

Jetoj me prindërit dhe vëllain, i cili është tre vite më i madh se unë. Kam mbështetje të pa kursyer, jo vetëm nga prindërit dhe vëllai, por edhe nga të afërmit e tjerë. Më kanë rritur me frymën se familja është gjëja më e shtrenjtë që kemi dhe unë përpiem ta ruaj atë me gjithë dashurinë që mundem t’u ofroj. Mendoj se nuk do të isha asnjëhërë kjo që jam, pa patur ata pranë në çdo hap që hedh dhe sigurohem ta marr miratimin e tyre në çdo situatë. Çdo prind ndihet krenar kur fëmija bën diçka të mirë, ndaj besoj se edhe prindërit e mi ndihen krenar për mua dhe atë çka unë reflektoj jo vetëm në politikë, por mbi të gjitha në karakter.

A ka pasur ndonjë rast, kur babai në shtëpi të ka thënë, se fjala e X dite që ke mbajtur në media, nuk i ka pëlqyer?

Babai im është njëkohësisht mbështetësi dhe kritiku im më i madh. Pyetja më me vend në këtë rast duhej të ishte: A ka pasur ndonjë rast, kur babai të ka thënë, se fjala e mbajtur në x ditë ka qenë shumë e mirë dhe e realizuar (buzëqesh). Megjithëse mërzitem ndonjëherë me gjithë kritikat që më bën, i jam shumë mirënjohëse për vëmendjen që tregon ndaj meje dhe që si ai po ashtu edhe mami, më kanë dedikuar gjithë përkushtimin e tyre.

A ke frikë t’i zhgënjesh? Përfshirja në politikë, shpesh të nxjerr nga habitatet normale, ti vetë, a i druhesh kësaj – tejkalimit të masës?

Kam shumë! Meraku më i madh që kam pasi bëj një dalje apo mbaj një qëndrim, është se mos i mërzis prindërit. Madje kur ndihem e pasigurtë nuk i dal babit para atë ditë. Në politikën shqiptare është shumë e vështirë të ruash sensin e masës dhe lehtësisht mund të provokohesh nga situata të ndryshme, por them se e kam gjetur një balancë me veten.

Gjatë fushatës, si të presin në takime? Kush flet më hapur më ty, të rinjtë apo mosha e prindërve të tu?

Më presin shumë mirë. Unë fushatën time e kam të përqëndruar në Tiranë dhe kryesisht në njësitë administrative 5 dhe 10. Kam takuar një pjesë shumë të madhe të banorëve në këto njësi, pasi fushata ime është derë më derë me kontakt të drejtëpërdrejtë me qytetarët. Të rinjtë janë më të lirshëm kur takojnë një bashkëmoshatare, ndërsa moshat më të rritura më mbështesin dhe besojnë se politikës i duhen të rinjtë e sinqertë dhe të përkushtuar.

Do donim të dinim, se çfarë u thua votuesve apo banorëve që takon në fushatë. Çfarë i thua një kryefamiljari të varfër, të papunë? Çfarë i thua një njeriu që është në gjendje ekonomike mesatare? 

Gjëja e parë që ata më thonë është që janë thellësisht të zhgënjyer nga politika dhe të lodhur nga mosmbajtja e premtimeve dhe arroganca me të cilën trajtohen. Propozimi im për ta është një klasë e re politike, e cila udhëhiqet nga ideali dhe sinqeriteti. Ju them se LSI është një parti e cila mbështet rininë dhe jo oligarkinë. Ne kemi një program konkret që ul taksat dhe krijon vende të reja pune dinjitoze dhe të mirëpaguara. LSI ka punuar një program për arsimin: Edukim Cilësor – Familje e Shëndetshme. Ne, ndryshe nga të tjerët nuk bëjmë barcoleta, as show, jemi të përgjegjshëm dhe e kemi vërtetuar se i qëndrojmë fjalës së dhënë.

Sa e vështirë është fushata – të shkuarit shtëpi më shtëpi, lagje më lagje, dhjetra njerëz, dhjetra problematika, dhjetra të ndryshëm, të asnjëllojtë me tjetrin, dhe ti, që duhet të përshtatesh me të gjithë…?

Kjo për mua është fushata e pestë në të cilën jam aktive dhe nuk më duket eksperiencë e re, pasi në LSI ne jemi gjatë gjithë kohës në fushatë. Duke dëgjuar problemet e qytetarëve, duke zhvilluar aktivitete, duke organizuar strukturat, etj. Është i vështirë ky proces, por edhe i bukur, pasi vërtet ndjen dhe vlerëson çdo shqetësim që votuesit kanë dhe i përjeton së bashku me ta.

Nëse dikush nga të pranishmit, zëmë shembull se i pakënaqur nga ju – nga politika – do tregohej i ashpër, si do reagoje?

Kam patur edhe raste të tilla edhe pse shumë të pakta në numër. Nëse e shoh se argumentat e mia, në asnjë rast nuk e bindin, buzëqesh dhe e falenderoj për ato minuta që më ka kushtuar. Më vonë me veten përpiqem të kuptoj ku kemi gabuar dhe çfarë mund të bëjmë më shumë për ta ndihmuar qytetarin në fjalë.

Nëse hapi i katër viteve të ardhshme është parlamenti, po më tej, ku do që të shkosh? Çfarë synon?

Synoj në rradhë të parë t’i shfytëzoj këto katër vite për të përmbushur angazhimet që kam marrë përballë votuesve dhe me LSI forcë të parë, e pjesë të qeverisjes, jam e sigurtë se do ja dalim. Politika ka sfida të përditshme, që ta bëjnë të vështirë t’i vendosësh vetes objektiva shumë të largët.

A e ke menduar shkëputjen nga politika, për të shkuar përshembull jashtë vendit me studime, ose këtu, por të merresh me jetë akademike, a me një tjetër profesion, veç asaj të ligjvënëses?

Jo thjesht e kam menduar, por i kam vendosur vetes detyrën të vazhdoj studimet, por kjo pa u shkëputur nga politika. Unë jam shumë e re që të mendoj se politika do të jetë profesioni im përgjatë gjithë jetës, prandaj kam studiuar për Inxhinieri Ndërtimi, kështu e kam të zgjidhur edhe këtë punë (buzëqesh). Unë do të jem në politikë për aq kohë sa ajo ka nevojë për mua dhe unë kam çfarë të ofroj për qytetarët. / revistawho.com

 

lexo më shumë

NË KOPERTINË / Klajda Gjosha, të jesh i vërtetë në politikë

KLAJDA GJOSHA

Nga revistawho.com / Fotot: Eisar Asllanaj

“Do doja t’ja thoja me fjalë dhe ai të më kuptonte, që është e vetmja gjë që më dhemb, kur detyrohem të largohem prej tij. Uroj që të më falë dhe të më kuptojë kur të jetë më i rritur”. Përtej gruas diplomate gjen një nënë te Klajda Gjosha. Gjuha e drunjtë ia lë vendin fjalëve më të dashura. Nga gjithë biseda me të, më mbeti në mendje kjo frazë, si për të vënë theksin te ajo që është më e rëndësishmja në jetë, buzëqeshja e fëmijës tënd dhe shikimi i tij i pafajshëm në një botë gjithë faje.

Kanë qenë për të, katër vite të arta. Dhe intensive. Njëherësh u bë nuse, mama për herë të parë dhe ministre e Integrimit. 4-vjeçari i ka ikur sa hap e mbyll sytë. “Tepër intensiv dhe i mbushur me ngjarje qoftë në jetën personale ashtu edhe për sa i përket punës”, – thotë ajo për revistën “WHO”.

Tanimë kryeson listën e kandidatëve për deputetë të Tiranës. Nuk ka qenë i lehtë, por tani në fund teksa bën bilance, mendon se ka qenë një nga periudhat më të rëndësishme të jetës së saj. “Mund të them me bindje se ndjehem e plotësuar për faktin se kam bërë maksimumin për të mos lënë pas dore as familjen time që është gjëja më e rëndësishme, por edhe për të përmbushur detyrën time si Ministre e Integrimit, të cilën e kam parë gjithmonë si një përgjegjësi të madhe, jo vetëm ndaj vetes, ndaj atyre që ma kanë besuar por së pari ndaj vendit, pasi unë besoj se integrimi është busulla që duhet të udhëheqë Shqipërinë, në mënyrë që fëmijët tanë të kenë të ardhmen e merituar”.

Bashkëshorti i saj, shok prej kohës së gjimnazit, në këto katër vite është bërë një partner edhe më i besueshëm. Asgjë nuk ka ndryshuar nga raporti i tyre i paprekshëm. “Ardiani për mua është mbështetja më e madhe, bashkëudhëtar në çdo hap që unë hedh. Nuk e di të them të drejtën nëse do t’ia kisha dalë po kështu nëse nuk do të kisha atë në krah”.

Në gjithë malin e angazhimeve marrëdhënia me të birin, Luisin, është ajo që i peshon. “E ndjen që e ke lënë paksa pasdore?”, – e pyes. Më flet për një borxh ndaj tij. Është kohë ky borxh. Një kohë që do të donte ta kalonte duke e parë si rritet çdo ditë. E gjithë kjo dëshirë, përkthehet edhe në mundim. “Ka pasur raste kur e kam marrë me vete (në fushatë). Kur nuk jam unë Luisi rri me Ardianin, gjyshërit”.

E kur orët kalojnë, mes turravrapit, zyrë, fushatë, LSI, takime, konferenca, dua të di se si reagojnë kur nënë e bir shohin njëri-tjetrin. “Do doja të më pyesnit si reagoj unë kur e shoh… sepse s’kam koment si reagon ai”, – thotë Klajda, që kur flet për të, është tërësisht jashtë kostumit institucional.

Ka qenë një kohë që e merrte me vete në Bruksel. Ai, si një diplomat i vogël, që ende i pavetëdijshëm hynte në pallatet e mëdha të Europës. Nuk jam penduar që e kam marrë me vete, pasi ai ishte shumë i vogël dhe duhet të ushqehej me gji. Ndaj ka qenë e pashmangshme marrja e tij në Bruksel apo udhëtime të tjera. Unë kam qenë gjithmonë shumë strikte me oraret e tij, madje jam akoma”, – thotë Klajda, e cila pohon se nuk është aspak xheloze që Luisi i ka ngjarë Ardianit. “Nuk ka vend për xhelozi fare, por nga ana tjetër Luisi ka karakterin tim. Është çështje kompensimi”, – thotë duke qeshur mamaja e lumtur.

VAJZA E KATËR DUARVE

Vajzë e një familjeve qytetare, e me këtë nuk nënkuptojmë vetëm origjinën, pasi Klajda, bart dhe rrezaton një fëmijëri të lumtur. Reflekton sigurinë e një vajze të përkëdhelur që ka pasur gjithnjë pranë katër duar që e ledhatonin. Janë ato duar që dikur teksa preknin, rrisin brenda saj vetëbesimin, motorin e rëndësishëm për të ardhmen.

“Nuk dua të tingëllojë një klishe, por për mua prioriteti më i madh janë njerëzit e mi të dashur. Besoj fort se asnjë pozicion nuk mund të jetë mbi marrëdhëniet me ta”, – më thotë kur e pyes se sa mbështetje kanë qenë për të prindërit. Megjithë ngarkesën që ka pasur, ka gjetur gjithnjë kohë t’u tregojë sesa të rëndësishëm janë edhe në ditët e saj më të lodhshme. “Siguria që ata më japin është e njëjtë edhe me një telefonatë të gjatë në fund të një dite super të rënduar”. Ende sot, këshillohet me babanë dhe bashkëshortin për vendime e deklarata, duke vlerësuar mendimin e tyre, për vërtetësinë. “Për ta, ka rëndësi ajo që duhet të jetë më e mira për mua”, – dhe këtu nuk ka asnjë dyshim.

Të jesh nënë e re dhe në një punë, ku nuk shmang dot asnjë përgjegjësi, padyshim që shton presionin e gjithanshëm, por edhe kjo është çështje këndvështrimi. Ajo mohon se Luisi e ka penguar duke shtuar:Madje më ka dhënë forcë edhe më shumë. Kam qenë gjithnjë kundra mendimit që një grua ose duhet të jetë thjesht një nënë e mirë, ose duhet të avancojë në karrierën e saj. Të dyja këto mund të ecin paralel, nëse ti vendos prioritete dhe balancë për secilën, ja del. Këtë duhet ta bëjë çdo nënë e re, të mos heqë dorë nga puna, jeta e saj, formimi i saj. Ky është modeli që duhet t’i ofrojmë fëmijëve tanë, sepse vetëm kështu ata mund të rriten shëndetshëm në çdo aspekt”.

NJË POLITIKË E VOGËL, BRENDA SË MADHES

Megjithë debatet e mëdha në politikë, ka mundur të ruajë një staturë larg fyerjeve në publik, çka shpesh duken të zakonshme në politikë. Duke lënë mënjanë retorikën e ashpër, Klajda Gjosha ia ka dalë të jetë vetëm Klajda. Për të, retorikat, fyerjet personale, ngritja e zërit, nuk të çojnë askund. “Unë kam hyrë në politikë për të treguar se ne mund ta ndryshojmë atë, jo të deformohemi prej saj. E them gjithnjë se të rinjtë në politikë duhet të sjellin produkt, të japin kontribut me dijet e tyre, vizionin, ide të reja, pasi jemi të gjithë të lodhur nga zhurma e madhe, veprat e pakta dhe fyerjet”. Ka vendosur t’i rrijë larg këtij realiteti që na serviret çdo ditë nëpërmjet ekraneve televizive, apo edhe në parlament.

“Por a ka qenë e vështirë”, – e pyes, “duke qenë e pranishme në debate të tilla, të mundet të qëndrojë aty dhe e papërlyer”. “Natyrisht që ka qenë e vështirë, pasi kultura e politikëbërjes në Shqipëri për hir të së vërtetës ka qenë e tillë. Madje të vjen keq edhe kur sheh politikanë të rinj apo politikanë që trumbetojnë një politikë të re, të flasin me gjuhën e vjetër të konfliktit. Është e papranueshme”.

Në LSI, e kemi parë me shumë figura. Flet për një bashkëpunim të shkëlqyer me të gjithë miqtë e saj në LSI dhe për një frymë të të punuarit në ekip, një frymë që në kohë sfidash e garash si kjo e 25 qershorit i bën bashkë të gjithë në front. Dhe kur mendon LSI, nuk mund të anashkalosh Monën. Në fakt, shumëkush flet për të si gruaja që gjen gjuhën me të gjithë, si njeriu tek e cila përplasen të gjithë për gjithçka, herë për këshilla e herë për orientime. “Në lidhje me Monën, ajo është shtylla me e fortë ku mbështeten të rinjtë, gratë, vajzat, jo vetëm brenda LSI, por edhe jashtë saj”, – thotë Gjosha.

Tani që raportet me një pjesë të qeverisë kanë ndryshuar si edhe me opozitën, nuk mund të mos pyesësh mbi kushtëzimin që ndjen vetë Klajda. Ajo rrëfen se si Ministre e Integrimit, pjesë e kabinetit qeveritar është përpjekur që në asnjë moment të mos përdorë logon e LSI-së, në vendimet e saj, qëndrimet e saj apo edhe vlerësimet e saj për atë që ndodh brenda qeverisë. “Kam qenë e prirur për një bashkëpunim maksimal me kolegët e mi, pavarësisht se nuk kemi qenë nga e njëjta force politike. Gjithsesi, tashmë jemi në kohë fushate, në një garë që jo vetëm nuk më ka kushtëzuar, por më lejon të jem shumë më e lirë nga më parë për të shprehur qëndrimin tim, duke përfaqësuar LSI-në”.

Në një fushatë pa administratën, çdokush merr me vete dhe ka pranë njerëzit e vet të besuar me të cilët menaxhon 1 muaj takime, biseda, në gjithë zonën. Njerëzit e saj të besuar thotë se janë qytetaret te cilët besojnë në vizionin e LSI-së. “Janë ata që më shoqërojnë çdo ditë. Një pjesë e mirë e tyre janë të rinj dhe të reja të palodhur në dëshirën e tyre për t’i dhënë vendit një qeverisje ndryshe, më transparente dhe në funksion të tyre”.

NJË ‘ANGLEZE’ NË SHQIPËRI   

Tani kanë mbetur larg vitet e studimit në Angli. Ajo kohë lirie mes ajrit londinez. Ajo kohë ëndërrimesh të pamata, që sot i prek me dorë, por që gjithsesi ruan prej saj, një stil të dallueshëm. Kultura  angleze, e fituar nga koha e studimeve, ka qenë një aset në marrëdhëniet njerëzore e profesionale, qoftë edhe në karrierën në Shqipëri. “Mendoj se më ka shërbyer shumë. Është një kulturë tjetër, një mënyrë tjetër të të bërit të gjërave. Të ndihmon në raportet profesionale, sa për pjesën njerëzore mendoj se ajo ka të bëjë me individin dhe jam e lumtur që nuk kam ndryshuar aspak tek kjo pjesë”.

Një “angleze” si Klajda i bën pushimet në Shqipëri, por edhe udhëton. “Nuk kam pasur destinacione fikse. Kam udhëtuar brenda dhe jashtë vendit. Jugu i Shqipërisë më pëlqen shumë”, – thotë ministrja e Integrimit. Edhe këtë verë do të pushojë, por pas zgjedhjeve.

Një ministre si ajo, është një njeri krejt i thjeshtë pas orarit e takimeve zyrtare. Axhenda përcakton mënyrën e jetesës, e përtej modestisë, e përditshmja ndryshon, por Klajda ruan jashtë kostumit një kënd të vetin, krejt normal. ”Detyra e ka ndryshuar jetën time  aq sa për të mos më ndryshuar mua, por kjo eksperiencë ka qenë shkollë më vete”. / revistawho.com

lexo më shumë

FOTO PAPARACI/ Albani, Bieta dhe Kroi Art shëtitje në Tiranë… Shikoni si duket vogëlushi

IMG_4758

Pasditen e sotme në qendër të kryqytetit shqiptar, shëtiste një familje e famshme dhe e bukur. Ardhur në jetë këtë pranverë, në kohën më të mirë të vitit, vogëlushi Kroi Art ka nisur shëtitjet e para me babin Alban Dudushi dhe mamin Bieta Sulo. Paparaci ynë i ka pikasur të tre duke na dhënë mundësinë të shohim për herë të parë imazhin e djalit të Dudushëve. Më vonë ka qenë vetë drejtuesi i “Top Show” që ka ndarë një çast të lumtur nga kjo pasdite në rrjetet sociale./ revistawho.com

Ju kujtohet dikur femije, na nxirrnin ne foto tek Sheshi Skenderbej? Ky i riu eshte me i bukur 😀😀😀

A post shared by Alban Dudushi (@albandudushi) on

Po ke dale fotografi tek sheshi Skenderbej mo mama 🤣🤣🤣🤣 … si dikur mama & baba #firstphoto

A post shared by Bieta Sulo (@bietasulo) on

lexo më shumë

INTERVISTA/ Venera & Lindi: Ju tregojmë për punën, dashurinë e ata që na ngacmojnë…

16681768_1420814974626781_4610451990052292720_n

Na lejoni ta themi, Venera dhe Lindi janë një nga çiftet më simpatikë në Shqipëri. Të dy të bukur fizikisht, të talentuar, të rinj, plot energji, humor, të gjitha këto i transmetojnë vetëm duke i parë në foto e jo më në skenë apo në një bisedë si kjo. Sapo kanë nxjerrë të dy nga një këngë të re, vazhdojnë punojnë fort, rriten edhe më shumë profesionalisht por mbeten të thjeshtë e të çiltër siç i kemi njohur prej fillimit. Do të na kuptoni më mirë pasi të lexoni përgjigjet e sinqerta e të lezetshme të kësaj interviste për “revistawho.com”

Këto ditë keni nxjerrë të dy nga një këngë të re, ku po ka dhe kush mendoni se do të ketë më shumë sukses?
Eshtë punuar fort për të dyja projektet. Kështuqë çdokush do e marrë suksesin e duhur.

A bëheni ju xhelozë për suksesin e njëri-tjetrit?
Aspak! Arritja e çdonjerit nga ne është arritje për të dy.

Por për fansat e fanset e fiksuar pas jush?
Jo. Jemi me fat që i kemi dhe duhet respektuar ky fakt.

Venera e gjithë Shqipëria e di që je me Lindin, ndodh të të gjuajë njeri?
Si mendoni ju? Lënë njeri pa ngacmuar këtu… (qesh)

Ty Lindi me siguri të ngacmojnë nga pak vajzat, apo jo?
A të lë vajzë pa të ngacmuar ketu… (qesh)

Zgjodhet të dy të njëjtën kohë për të publikuar materialet e reja, pse?
Erdhi natyrshëm. Kemi punuar në kohë të ndryshme për këngët por klipet i xhiruam bashkë sepse ashtu na erdhi më mbarë. I publikuam njëri pas tjetrit sepse tani mendojmë që është koha e duhur për të sjellë projekte të reja.

Mendoni se do t’iu shtohen propozimet për koncerte edhe më shumë?
Absolutisht! Për këtë po investojmë dhe po punojmë.

Si e keni axhendën në verë, keni mbyllur ndonjë datë?
Ka data të mbyllura. Urojmë që të shtohen edhe më shumë.

Në punë bashkë, jashtë pune bashkë… Marrëdhënia juaj si po shkon, ka nisur t’iu mërzitet njëri-tjetri apo akoma?
Akoma?! (qeshin) Jo s’ka asnjë mërzitje, përndryshe s’do rrinim bashkë.

A jeni ju për shembull në fazën, marrim ndonjë çift tjetër për pushime se “nuk shtyhet muhabeti”?
Hmmm… Jemi të hapur për shoqëri dhe i duam njerëzit por jo se jemi mërzitur bashkë.

E meqë ra fjala, pushimet ku do i kaloni?
S’e kemi vendosur ende. Ka punë më parë pastaj pushime.

Plane më afatgjata si martesa dhe fëmijët keni bërë? Kush nga ju të dy dëshiron më shumë të bëhet prind?
Jo. Mendojmë se është herët edhe pse dëshira është e madhe nga të dy ne.

Venera çfarë dashuron më shumë tek Lindi? Po ti Lindi? (jo tek vetja por tek Venera)
Të dy tek Lindi dashurojmë “Krejt Lindin” (qeshin).

Mendoni se shqiptarët do t’iu donin kaq shumë edhe po të ishit tek e tek?
Besojmë se po. Publikun e kemi fituar veç e veç njëherazi e më pas si çift.

lexo më shumë

NË KOPERTINË / Elvis Pupa në një bisedë për gruan, rikthimin në Tiranë, verën dhe sezonin e ri në ekran

Elvis Pupa kopertin2

Nga RevistaWho.Com / Fotot: Pirro Beati / Video: Blerti Talelli / Make Up: Pranvera Metolli

Sivjet në ekranet shqiptare Elvis Pupa solli një frymë të re të të bërit humor, duke drejtuar një nga programet më të suksesshme të sezonit – “M’fal për shprehjen”. Sigurisht që shqiptarët i kishte marrë malli për Pupën e të gjithë karakteret simpatike që ai ka sjellë ndër vite. Por “larg syve, larg zemrës”, dilema nëse do të arrinte Pupa sërish të rifitonte zemrat e shqiptarëve ishte e madhe. Ai jo vetëm ia doli, por i tejkaloi pritshmëritë. E kush nuk ka qeshur me rubrikën e famshme “Burri-gruaja”?! Pikërisht për të gjitha këto e për të kuptuar më shumë për vazhdimësinë e këtij programi, ne vendosëm ta pyesnim vetë Visin. Nuk mund të mos i kërkonin edhe komente për “gratë”. Ai i thotë të gjitha në “revistawho.com“, duke na zbuluar edhe ku do te jetë këtë verë.

Sapo përfundove një nga programet më të suksesshme të sezonit. Kur bëre gati valixhet për të ardhur këtej e prisje këtë rezultat? Sa i trembeshe?

Më kishte marrë malli për publikun dhe shpresoja për anasjelltas. Nuk më ka trembur sepse e kam menduar gjithmonë si kënaqësi dhe mezi kam pritur të rikthehem.

A mendon dhe “Digitalb”-i njësoj si ne? Ta rinovuan kontratën?

Besoj që do rikthehemi në ekranin e platformës ‘Digitalb’ në tetor.

Ishte një kontratë me shumë zero ajo e jotja? Për sa para u ktheve nga SHBA?

‘Digitalb’ gjithmonë ka ditur të të vlerësojë dhe të të prezantojë shumë mirë profesionalisht. Nga ana tjetër, unë dal në skenë kur kam diçka për të dhënë dhe jo domosdoshmërisht kur më duhet diçka për të marrë.

Pse mendon që i bëre kaq shumë për vete shqiptarët, çfarë ke ti që të tjerët nuk e kanë?

Unë nuk kam asgjë që të tjerët nuk e kanë. Thjesht unë i përdor të gjitha aftësitë që kam në funksion të profesionit dhe gjërat që dua i bëj, nuk i lë thjesht në ide.

Sa je lodhur këto muaj?

Shuuuuuumë! Po ç’rëndësi ka kur pëlqehet puna dhe kur ke përpara stinën e verës për pushime.

Rubrika që shënoi rekord në audiencë ishte “Burri- Gruaja”, pse shqiptarët e deshën aq shumë?

Sepse ajo i flet çdo çifti. Janë situata të jetës në çift ku secili gjen veten. Në fund të fundit të gjitha gratë janë njëlloj. E njëjta gjë vlen dhe për burrat.

Sa ka tek Visi i Eglës nga vetë Elvis Pupa? Sa ka nga jeta jote bashkëshortore në ato skenare?

Si pjesë e të njëjtit realitet, ka goxha. Por, çdo përafërsi me persona dhe ngjarje reale është thjeshtë rastësi (qesh).

Martesën me Eglën do e përshkruanim me shprehjen tonë të urtë “Kush të rreh, të do”? A vlen kjo edhe për martesën tënde, atë të vërtetën?

Kush të do, të mirëkupton. Ai që të rreh, e bën këtë se është frikacak dhe trembet se do rrihet në qoftë se nuk e bën i pari.

Nëse do t’i përshkruaje gratë vetëm me 3 fjalë, cilat do të ishin ato?

Nuk dinë ç’duan!

A është gruaja jote fanse e çiftit Visi-Egla?

Ështe fanse dhe kritike e çdo vepre artistike timen.

Të jep ajo sugjerime? Të kritikon?

Gjithmonë. Me shumë sugjerime se kritika në fakt.

Ti dhe Egla jeni kombinimi perfekt për ato role, kaq e thjeshtë sa duket ishte që në fillim?

Unë dhe Egla njihemi që në Akademi dhe kemi performuar në shumë produksione teatrore bashkë. Ajo ështe shumë profesioniste dhe çdo gjë shkon perfekt në sheshin e xhirimit.

Tani që i interviston vetë VIP-at, na kupton ne? E shikon sa e vështirë është…

Shuuuuumë! Prandaj nuk kam ftuar VIP-a, por profesionistë. Ka shumë ndryshim.

Cilën prej atyre intervistave do të veçoje? Kush të ka impresionuar?

Nuk veçoj dot se të gjithë kanë qenë të veçantë, por më simpatikët kanë qenë Florjan Binaj dhe Sinan Hoxha.

Ke zgjedhur të bashkëpunosh me kolegët e vjetër, nuk të pëlqen të eksplorosh talente të rinj?

Në art nuk jemi aq me fat sa në politikë. Aty vërshojnë talentet.

Ermal Mamaqi ka një program pak a shumë të ngjashëm e një tjetër ka nisur edhe Romir Zalla. Nuk po shtoheni ca si shumë?

Edhe restorante ka shumë, por kur shefat gatuajnë menu të ndryshme dhe klientela seleksionohet.

Tani që presim sezonin e dytë, me çfarë merret Elvis Pupa? Do të riktheheni në Amerikë?

Tani merrem vetëm me familjen time të cilës i kam munguar gjatë sezonit. Patjetër që verën do e kaloj në Amerikë. E kam më të lehtë të krijoj në qetësi.

A e ka të vështirë gruaja jote të të ndjekë pas në punët e tua, pa pasur mundësi te ndjekë diçka të veten?

Ajo më ndjek mua dhe pasionin e saj. Duke qenë se është pedagoge edhe ajo e ka verën të lirë dhe koordinohemi në punë dhe pushime.

Tani për mbyllje do të të bëjmë një pyetje tipike shiptare, që kushedi sa shpesh e dëgjoni: Kur do të bëheni me fëmijë?

Pa merak. Kemi plotësuar formularët dhe po presim përgjigjen e aplikimit. / revistawho.com

lexo më shumë

Kur DITËLINDJA kthehet në ‘BABYSHOWER’. Kristina Neranxi mbledh miqtë dhe zbulon emrin e djalit (Fotot, detajet dhe dhuratat)

IMG_8252

FOTOT: Altin Çelmeta

Mbrëmja e djeshme ka mbledhur në një prej ambienteve më të bukura të Tiranës, miqtë më të dashur të sipërmarrëses Kristina Neranxi, e cila mirëpriti në “Divina Boutique Hotel” 50 të ftuarit e saj ekskluziv. Dy festa në një, ku veç ditëlindjes së vajzës së vogël të themeluesit të kompanisë “Neranxi” (Kristinës), festa e vërtetë do të ishte ajo e “BabyShower”, në pritje të djalit të parë të biondes bukuroshe.

Tarraca e dekoruar nga “Class by Alketa Vejsiu”, na zbuloi ende pa mbërritur të ftuarit e parë kodin e veshjes për atë mbrëmje. Njësoj si mami e ardhshme Kristina (e cila u vesh nga Miranda Dupi), edhe të ftuarit duhej të ishin veshur në nuancat e të bardhës ose bojëqiellit… Sepse torta, ëmbëlsirat, tullumbacet, pijet jooalkoolike, lulet e “Back Drop Flowers Albania”, thuajse të ftonin në ‘dhomën’ që mami Kristina dhe babi Renato po përgatisin për të voglin e tyre, që, që ta dini, ia kanë zgjedhur tashmë edhe emrin. “Gabriel” do të quhet fruti i dashurisë së tyre, që në hebraisht nënkupton shprehjen “Zoti është forca ime”, ndërsa në kultura të tjera njihet si engjëlli i dërguar prej tij.

Me ardhjen e të ftuarve të parë nisën të zbuloheshin edhe dhuratat. Shumica prej mysafirëve i kishin përqëndruar të gjitha energjitë në zgjedhjen e një dhurate sa më të bukur për Gabrielin, që pritet të vijë në jetë pas pak javësh. Ajo që ra në sy që në fillim ishte një kompozim me 1000 trëndafila nga babi i Grabielit për mamanë e ardhshme Kristinën, në të cilat shkruhej emri i saj dhe i djalit që pritet të lindë.

Për të ftuarit veç pijeve u shërbye edhe një banket i përgatitur nga Alfio dhe Indriti, dy masterchef-at e restorant “Divinës” si dhe përgjatë gjithë mbrëmjes pati muzikë latine me balerinë profesionistë që i shoqëronin të ftuarit. / revistawho.com

 

lexo më shumë

Gjithçka duhet të dini për trajtimin me plazmë, nga kohëzgjatja, rezultatet e deri tek çmimi

18678894_120332000969768416_95194820_n
Nga Migena Gega – Dermatologe / SkinTechDermaCenter

PRP i referohet “plazmës së pasur me trombocite”, e cila prodhon një efekt rinues dhe elasticizues në lëkurën tuaj. Terapia me PRP përdor plazmën e pasur me trombocite (plazmën dhe trombocitet tuaja të marra nga një kampion gjaku vetjak), për të stimuluar kolagjenin dhe për të përmirësuar dukjen e lëkures dhe elasticitetin e saj. Është një trajtim shumë i rëndësishëm për lëkurën, sidomos në zonën rreth syve, qafë, dekolte, gjithë fytyrën dhe duart. Përgjithësisht nevojitet një trajtim në muaj për 3-4 muaj.

Trajtimi zgjat 1 orë. Një protokoll i plotë trajtimi përfshin 3-4 seanca me distancë kohore deri në 1 muaj, dhe rezultatet mund të mirëmbahen me një trajtim në 6-12 muaj, në varësi të specifikave të lëkurës.

Është një trajtim shumë i sigurt, pikë së pari sepse përdoret gjaku juaj, kështu që nuk ka shanse për ndonjë reaksion alergjik, ose efekte anësore serioze. Gjithsesi krahasuar me botox-in, kjo terapi ka një periudhe rekuperimi post-procedurës më të zgjatur. Ënjtja dhe skuqja në zonat që injektohet është e zakonshme, dhe mund të bëhet akoma me e dukshme në zonën përreth syve, zakonisht për 24 orët e para. Pak nxirje e lëkurës, është gjithashtu e pritshme, e cila mund të mbulohet me make-up 24 orët e para, dhe mund të zhduket gradualisht pas 1-2 javësh.

Çfarë është terapia me plazëm?

Plazma e pasur me trombocite merret nga gjaku juaj. Trombocitet janë rruazat e gjakut që ndalojnë hemorragjinë kur ju vriteni. Funksioni tjetër i tyre është të promovojnë shërimin e shpejtë të plagëve duke aktivizuar qelizat e rritjes. Procedura kryhet duke marrë një sasi të vogël gjaku nga trupi juaj (ashtu siç bëhet në marrjen e një analize të zakonshme gjaku), dhe duke e vendosur atë në një proces centrifugimi (me aparatura te posaçme), për të ndarë rruazat e kuqe të gjakut nga trombocitet apo pllakëzat e gjakut. Kjo PRP që centrifugohet, injektohet më pas në lëkurë, me një sërë injeksionesh të vogla.

Trajtimi me PRP është diçka që njihej edhe më parë në botë, si terapi efikase për të bërë përshpejtimin e shërimit të plagës në kirurgji dhe në traumat sportive.

TERAPIA ME PLAZËM ËSHTË IDEALE PËR:

– Rrudhat

– Përmirësimin e dukjes së lekurës

– Lëkura e thatë pa shkëlqim

– Stimulimin e rritjes së flokut, rënien e flokut dhe flokët e hollë

ZONAT KU PËRDORET MË SHPESH:

Gjithë fytyra

Qafa

Zona përreth syve

Dekolteja

Duart

SA KOHË ZGJAT REZULTATI ME PRP?

Rezultatet e trajtimit variojnë, por në momentin që indi rigjenerohet, ky rezultat mund të jetë i përhershëm. Megjithatë ndërsa ne plakemi, problematika bëhet më e shprehur, dhe mund të duhet një mirëmbajtje e cila mund të bëhet 1 herë në 9-18 muaj.

SI TË PËRGATITEMI PËRPARA TERAPISË ME PRP

Nëse doni rezultat është mirë të evitoni duhanin. Mos përdorni drogëra, evitoni alkolin e tepërt, dhe në mënyre absolute mos pini aspirinë dhe medikamente te ngjashme si Nurofen, Ibuprofen dhe Voltaren 2 javë përpara trajtimit dhe 4 -6 javë pas. Në qoftë se merrni suplemente nga goja me omega3, duhet t’i ndaloni në të njëjtën periudhë si medikamentet e sipërpërmendura.

SA KUSHTON NJË SEANCË

Një seancë kushton 100-150 euro në varësi të kombinimit ose jo me dermapen (aparaturë që përdor mikrogjilpëra njëpërdorimëshe, për një rezultat më të mirë).

REZULTATET PAS PROCEDURËS

Menjëhere pas procedurës, ju do të ndjeni ënjtje nga injektimi i likidit. Pas disa javësh, trombocitet stimulojnë faktorët e rritjes, dhe ju do nisni të shihni efektin në lëkurën tuaj. Qafa reagon më me vonesë se fytyra. Përdorimi i mikrogjilpërave rrit rezultatin. Një aparaturë me age të vogla (dermapen) ose dermaroller, mund të përdoret në momentin e terapisë. Nëse ju konsumoni shumë alkool, duhan, ose lloje të ndryshme drogërash, përmirësimi i lëkurës tuaj është minimal.

Rrudhosja shumë e shprehur dhe çikatriçet e rënda mund të reagojnë më me vonesë, apo të kërkojnë procedura të tjera estetike për rezultat të kënaqshëm.

KUSH NUK MUND TË PËRDORË PRP

Personat që abuzojnë me alkool, duhan apo drogëra të tjera. Ky trajtim nuk rekomandohet gjithashtu për personat me sëmundje të gjakut, probleme të mpiksjes së gjakut, gjendje septike apo infeksioni, sëmundjet kronike, gjendjet kanceroze apo sëmundje shumë të shprehura të mëlçisë. Personat që përdorin preparate të tilla si aspirina, ëarfarina, Plavix (clopidogrel), Perantinë apo Cyclokapron, nuk janë kandidatë për këtë procedurë.

Është shumë e rëndësishme që të flisni përpara procedurës me mjekun që do të kryejë procedurën, të informoheni shumë mirë për efektet anësore të mundshme, të bëni pyetje në rast paqartësie, si dhe plotësimi gjithnjë i fletës së konsensusit.

 

lexo më shumë

EKSKLUZIVE/ Andrra dhe Sinani festojnë ditëlindjen e parë të Ansit (FOTOT+DETAJET)

18685482_120332000986900215_1180890481_n

Foto të realizuara nga Altin Çelmeta

Sot ka festë në Tiranë. Vogëlushi i këngëtarit Sinan Hoxha dhe bashkëshortes së tij bukuroshe Andrra feston ditëlindjen e parë. Ne po iu sjellim ekskluzivisht në “revistawho.com” fotot dhe detajet e para nga ditëlindja. Sinani dhe Andrra kanë mbledhur miq e familjarë në një restorant me emër në zonën e Dajtit, në kryeqytet. Të pranishëm janë edhe shumë personazhe të famshëm shqiptarë.

Në festën e organizuar bukur nga “Ami Event” plot ngjyra e lojëra për fëmijët, janë të ftuar njerëz të njohur si Amarda Toska e Ermal Mamaqi, Soni Malaj, Eneda Tarifa, Rovena Dilo, Elona Duro, Valbona Mema, Silva dhe Dafi Derti, Inis dhe Ingrit Gjoni etj. Sigurisht që Mamaqi është kthyer në protagonistin e festës, duke marrë të gjithë vemendjen e fëmijëve. Çifti kanë bërë në rrjetet sociale edhe nga një dedikim për Ansin e tyre, ndërsa siç e shihni edhe nga fotot, ata na sollën sot një nga tablo të mrekullueshme familjare. Andrra duket mahnitëse!

DEDIKIMET

“Kam gjithçka kam dashur në jetë”, ka shkruar Sinani krahas një fotoje shumë të bukur. Ndërsa mami Andrra ka dashur të shprehë shumë më tepër. Lexoni më poshtë dedikimin e saj.

“Lajmi i ardhjes tëndë në jetë ishte vula me vlerë të panumërt e dashurise që na mbështillte mua dhe babin tënd.Ndonëse rrugëtimi i njohjes dhe kurorëzimit tonë ishte i mbushur me emocione të pakufijta e thellësisht të ndjera, asgjë s’ishte e barasvlefshme me lajmin që na mbushi jetën në mënyrë të papërshkrueshme. Teksa ti frymoje brenda meje,përpiqesha të të imagjinoja në tërësinë tënde e thurja ëndrra të pafundme për ty.Mëngjesi me zgjonte me mendime për ty e nata mbyllej me dorën mbi barkun që brenda kishte mrekulline time. Ditët i linin rradhën njëra-tjetrës, barku rritej e unë çdo ditë e më shumë të ndjeja në pafundësinë time. Babi yt erdhi në Gjermani për të mbajtur koncertin e rradhës sëbashku me kolege të tij. Përgjatë të gjithë koncertit, ndonëse tingujt ishin të forte, dukej sikur kjo situate s’të shqetesonte aspak e ti njësoj si çdo ditë flije në barkun tim. Ama, sapo ai preku skenën e mori mikrofonin për të kënduar vargjet e para, ti në atë çast me dhe gjurmën tënde të parë, GODITJEN TËNDE TË PARË! E shoh të kotë të vazhdoj të shkruaj për Mrekulline e 8-të tonën. Ti je fryt i dashurisë sonë dhe Diell i pashtershëm që çdo ditë e më shumë rrezaton jetët tona.25.05.2016. Kjo është data që shënoi jetën time e të babin tënd. Ahhhh sa shumë ndiej e sa pak mund të shkruhet për ty…Ti je jetë që jetës sime i jep jetë. Nuk ka lumturi më të madhe e më të prekshme teksa shoh që unë dhe babi yt, jemi përfshire me gjithsej tek ty. Trekëndeshi Sinan-Andrra-Ansi ishte gjithçka që unë kisha ëndërruar në jetë!/ revistawho.com/

 

lexo më shumë
1 2 3 4 5 9
Page 3 of 9